Պայքար մանրէների դեմ

Եթե ընտանիքում որևէ մեկը հիվանդացել է, հարկ է միջոցներ ձեռք առնել, որպեսզի մյուսներին զերծ պահել ինֆեկցիայից: Ինֆեկցիայի տարածման գլխավոր «մեղավորներն» են դռների, պատուհանների բռնակները և մյուս բոլոր առարկաները, որոնց հետ  հաճախ եք շփվում, անկողնային պարագաները` սպիտակեղենը,  սրբիչները, մահճակալի ծածկոցները, բազմոցի բարձիկներըը, նաև անձնական հիգիենայի առարկաները` ատամի խոզանակը, ամանեղենը, թաշկինակները:

Արագ որոշում

• Լվացեք խոհանոցի, լոգարանի, լուսամուտների բոլոր բռնակներն ու ծորակները: Դրանք մանրէների սիրած վայրն են և ընտանիքի բոլոր անդամներն օրվա մեջ մի քանի անգամ դրանց հետ շփվում են: Մանրէներն այդտեղ կարող են ՙապրել՚ մինչև 48 ժամ: Բռնակները մշակեք հատուկ ախտահանիչ լուծույթով: Այն առարկաները (հեռակառավարման վահանակները, հեռախոսները և այլն), որոնք խորհուրդ չի տրվում այդ լուծույթներով մշակել, հարկ է սպիրտի մեջ թրջած բամբակով սրբել:

• Հաճախակի փոխեք անկողնային սպիտակեղենը, որովհետև գրիպով հիվանդը հիմնականում անկողնային ռեժիմ է պահպանում: Հարկ է հաճախ փոխել սրբիչները: Դրանք հարկավոր է լվանալ բարձր ջերմաստիճանի ջրով: Չմոռանաք նաև դեկորատիվ բարձիկների, ծածկոցների մասին, եթե դրանք չի կարելի լվանալ, ապա մշակեք ախտահանիչ սփրեյով: Խորհուրդ ենք տալիս լվացքից հետո ախտահանել նաև լվացքի մեքենան:

• Անձնական հիգիենայի միջոցներ: Հնարավոր է, որ հիվանդի ափսեն և բաժակը լվանում եք սովորականից ավելի երկար, բայց պարզվում է, որ դա այնքան էլ արդյունավետ չէ: Պարզապես այն լվացեք շատ տաք ջրով և ամանների համար նախատեսված հոտուկ օճառով: Հարկ է ուշադիր լինել հատկապես թաշկինակների նկատմամբ, որոնք օգտագործել է հիվանդը: Դրանք չի կարելի թողնել անկողնու մեջ, սեղանի վրա և որտեղ պատահի: Եթե դրանք մեկանգամյա օգտագործման  համար են նախատեսված, հարկ է  դեն նետել, իսկ կտորից կարվածներն անմիջապես լվանալ: Հիվանդին նաև անհրաժեշտ է ատամի նոր խոզանակ, որը պետք է առանձին տեղում պահել:

Ինչ է անհրաժեշտ ձեռքի տակ ունենալ

• Ախտահանիչ միջոցներ,

• բժշկական սպիրտ և բամբակ,

• լվացքի մեքենա,

• սպիտակեցնող լուծույթներ:

Հարցեր, պատասխաններ, մեկնաբանություններ